પ્રિય ભાઈઓ તથા બહેનો,

નમસ્કાર

શ્રી ઉમિયા માતાજીની અસીમ કૃપાથી આપણા શ્રી ૪૨ ગામ કડવા પાટીદાર સમાજ, (મધ્ય ગુજરાત) અમદાવાદનું બીજ ૧૯૯૩ માં રોપાયું ને સ્થાપના થઈ. આપણા વડીલોની ખૂબ જ જહેમત અને સંગઠનના પ્રયત્નોને અંતે સમાજન ઉત્તરોત્તર વિકાસ થવા લાગ્યો.

ભૂતપૂર્વ તમામ પ્રમુખશ્રીઓ, મંત્રીશ્રીઓ, તમામ હોદ્દેદારો તથા કારોબારીશ્રીઓએ પોતાની રીતે ખૂબ જ મહેનત કરીને સમાજને ટકાવી રાખવા માટે તન-મન-ધનથી યોગદાન આપેલ છે. શ્રી ગોવિંદભાઈ એસ. પટેલ, શ્રી પી.સી. પટેલ, શ્રી પી.એમ. પટેલ, શ્રી ડાહ્યાભાઈ સી. પટેલ, શ્રી કાંતિભાઈ સી. પટેલ, શ્રી બળવંતભાઈ એમ. પટેલ, શ્રી નારણકાકા, શ્રી પરસોત્તમદાસ બી. પટેલ, શ્રી બચુભાઈ બી. પટેલ, શ્રી કાળીદાસભાઈ એસ. પટેલ વગેરે વગેરેનો જેટલો આભાર માનીએ તેટલો ઓછો છે.

આપણે ત્યાં દર વર્ષે નવી કારોબારીની રચના થાય છે, ઘણાં બધા મિત્રો દર વર્ષે કારોબારીમાં સ્થાન પામે છે ને દર વર્ષે નવી ઊર્જા સાથે પૂરી લગનથી નિઃસ્વાર્થ કાર્ય કરતા જાય છે, તેથી જે તો હાલ આપણાં સમાજમાં લગભગ ૯૦૦ જેટલા કુટુંબો આપણાં સભ્યો છે. આમાના જે સભ્યો નિઃસ્વાર્થ સેવા આપી રહ્યા છે તેમનો પણ આ તબક્કે આભાર માનું છું.

વર્ષ ૧૯૯૭માં પ્રથમ આવૃત્તિ, વર્ષ ૨૦૦૬માં દ્વિતીય આવૃત્તિ, વર્ષ ૨૦૧૨માં તૃતિય સ્મૃતિગ્રંથ આવૃત્તિ પ્રકાશિત કરવામાં આવેલી છે. આપણે ત્યાં કહેવત છે કે ‘‘ આપ મુઆ વિના સ્વર્ગે ન જવાય.'' કેટલાક કાર્યો આપણે જાતે કરીએ ત્યારે જ આપણને તે કાર્યનું મહત્ત્વ ને મહેનત સમજાય છે.

ચાલુ વર્ષે ૨૩ ડિસેમ્બર ૨૦૧૮ના રોજ પરિવાર સ્મૃતિગ્રંથની ચતુર્થ આવૃત્તિ આપ સૌના કર કમળમાં મૂકતા હું હર્ષની લાગણી અનુભવું છું. આપણાં ઉત્સાહી અને જાગૃત એવા પ્રમુખશ્રી તથા કારોબારી મિત્રોએ મને અંક સંપાદન માટે કન્વીનર બનાવ્યો ને મારામાં વિશ્વાસ મૂક્યો તે બદલ તેમનો આભારી છું. રાત - દિવસ જોયા વગર ખૂબ જ તનતોડ મહેનત કરી છે મને પ્રમુખશ્રી ત્રિભોવનભાઈ એસ. પટેલ (કેવડીયા) તથા મારા સહ કન્વીનરશ્રી જયંતીભાઈ પી. પટેલ (નવાગામ) મને ડગલે ને પગલે માર્ગદર્શન અને સહકાર આપ્યો છે, તે બન્નેનો હું હૃદય પૂર્વક આભારી છું. બીજા સંપાદન કમીટીના સહસભ્યોએ ખૂબ જ મદદ કરી છે તેમનો પણ આભારી છું. વિશેષ કરીને અંકના સંપાદન અને પ્રગટી કરણના વિશાળ ખર્ચને પહોંચી વળવા માટે સમાજના સૌ જાહેરાતના દાતાશ્રીઓનો વિશેષ આભાર વ્યક્ત કરી રહ્યો છું, તેમના યોગદાન વગર આ ભગીરથ કાર્ય શક્ય બનત નહીં.

આપણો સમાજ આજે વટવૃક્ષ બનવા જઈ રહ્યો છે,

આ પ્રસંગે સમાજના યુવાનો - યુવતીઓને જાગૃત થઈ સમાજની નવી કારોબારીમાં જોડાવા માટે હું વિનંતી કરૂ છું. નવા યુવક- યુવતીઓ જોડાશે અને સારી પ્રવૃત્તિઓનું સૂચન કરશે, નવી રચનાત્મક પ્રવૃત્તિઓની સુગંધ સમાજમાં ફેલાશે તો સમાજમાં નવો પ્રાણ ફૂંકાશે. ‘‘ સમાજ ફક્ત ચીલાચાલુ પ્રવૃત્તિઓજ કરે છે તેમ કહેવાને બદલે સમાજ માટે મેં શું કર્યું ? મારૂં કે મારા કુટુંબનું યોગદાન કેટલું છે ? તે બાબતે ચિંતા અને ચિંતન કરવાનો સમય હવે પાકી ગયો છે.’’

સમાજને વિશેષ ગતિ આપવા માટે બાકીના તમામ સભ્યો ભોજન ફંડ સહાય ફંડના આજીવનદાતા (૩૦૦૦/- રૂપિયા) બને તથા આપણું આગામી નવું સ્વપ્ન સમાજનું પોતાનું એક મકાન કે ઓફિસ કે વાડી હોય તેને સાકાર કરવા દરેક પોતાનું યોગદાન આપે તેવી અપેક્ષા પણ રાખું છું.

સમાજના નવશિક્ષીત યુવાનો - યુવતીઓને હું આહ્વાન પણ કરૂં છું કે પોતાની કારકિર્દીની સાથે સાથે પોતાની જિંદગીનો થોડોક સમય સમાજના કાર્યો માટે કાઢે. જો નવી પેઢી તૈયાર નહીં થાય તો.....? નહીં થાય તો સમાજ માટે ચિંતાનો વિષય છે.

સમાજમાં શિક્ષણ વર્ધને શિક્ષિત સમાજ જ પ્રગતિ કરી શકે. ટેકનોલોજીના નવા જ્ઞાન સાથે કદમ મિલાવવા માટે નવી પેઢીના યુવાનો - યુવતીઓની સમાજને ખાસ જરૂર છે. માટે ઉત્સાહી યુવાન - યુવતીઓને સમાજની પ્રગતિ માટે સમય કાઢવા માટે નમ્ર અનુરોધ છે.

આપણે સૌ જાણીએ છીએ કે “સત્કાર્યો કદી એળે જતા નથી, આદર્યા કાર્યો કદી અધૂરા રહેતા નથી.''

ચતુર્થ અંકમાં કોઈપણ પ્રકારની જાણે અજાણે ક્ષતિ કે મુદ્રણ દોષ રહી ગઇ હોય તો સંપાદક મંડળ વતી કન્વીનર તરીકે હુંક્ષમા માગું છું.

પ્રત્યક્ષ કે પરોક્ષ રીતે સહકાર આપનાર સૌનો હું હૃદય પૂર્વક આભાર માનું છું.